Azken Berriak - Lagun Onak Mendi Bazkuna, Gipuzkoa

Reel Rock 16, maiatzaren 26an

Data: .

Eta udaberriko Mendi Astea bukatzeko… Reel Rock 16! Bai, eskaladaren ikus-entzunezko festak Azpeitian egingo du geldialdia. Emanaldiak lau pelikula ekarriko ditu gurera estreinakoz: Bridge Boys (fisuren eskalada beste maila batera eramanda), Big Things to Come (Alex Johnson eliteko eskalatzailearen hamarkada luzeko bidaia), Barefoot Charles (kobazulotan bizi den opera abeslari eta eskalatzailea) eta Cuddle (munduko eskalatzaile onenak, Alpeetako pareta latzenen kontra). Pete Whittaker, Tom Randall, Alex Honnold, Tommy Caldwell… zerbait gehiago menuan? Ba bizkor ibili eta hartu zure sarrera Kulturazen web orrian, 5,5 euroren truke. Animatu!

20220518 ReelRock16 copia

Mendiko Ahotsak, maiatzaren 25ean

Data: .

Udaberriko Mendi Astean ezin zuen falta #MendikoAhotsak emanaldi sortak. Gogoratuko duzuenez, gure 75. urtemugan ekin genion zikloari, baina ekimena geratzeko etorri da. Oraingo honetan, Ekaitz Maiz eskalatzaile eta alpinista etxauriarra izango dugu gurean. Denetik egin du mutil honek: bederatzikoak kateatu ditu, neguko irekierak, 400 bide baino gehiago ekipatu…

Azpeitian “Pamir 2021, Harria eta Izotza” filma aurkeztuko du, euskal-katalandar talde batekin egindako espedizioa. Ak-Su-ko haranean hainbat eskalada egin zituzten, tartean, mundu mailan Bigwall-eko super-klasiko den “Perestroika Crack”; Komunismo mendian, ia 7.000 metrotara, erreskate batean parte hartu behar izan zuten; eta espedizioa Korzhenevskaya (7.105 metro) mendiaren gailurra zapalduz bukatu zuten. Plan hoberik asteazkenerako?

20220518 Ekaitz Maiz2 copia

Txalintxoko Eguna 2022

Data: .

20220512 Txalintxoko Eguna

Datorren asteko igandean hain gogoko dugun egun horietako bat ospatuko dugu: Txalintxoko Eguna, ume, gaztetxo zein helduentzat plan polita. Goizeko 9:00etan abiatuko gara herriko plazatik eta, buelta osatu ostean, Loiolatxo elkartean bazkaltzeko aukera egongo da (horretarako, gure web orrian eman behar duzue izena). Animatu, irteera polita izan ohi da eta!

  • Eguna: maiatzak 22, igandea.
  • Ibilaldi mota: goizeko ibilaldia, ume, gaztetxo zein helduentzat.
  • Irteera: goizeko 9:00etan, herriko plazatik.
  • Bazkaria (parte hartzeko izena eman behar da, beheko formularioa beteta):
    • Lekua: Loiolatxo elkartea.
    • Ordaina: X euro.

Mendi Tour, maiatzaren 24an

Data: .

Datorren astea oso potente dator mendiarekin erlazioa duten emanaldiei dagokionean: udaberriko Mendi Astea! Maiatza 24, 25 eta 26an izango ditugu ekitaldiak eta, hasteko, Mendi Film Festivaleko filme onenetariko batzuen hautaketa izango dugu ikusgai. Sarrerak, ohi bezala, Kulturaz-en eskuratu ditzakezue. Eta, hurrengo emanaldiei dagokionean, datozen egunetan iragarriko dizkizuegu. Beraz, adi gure sareei!

20220517 MendiTour3

150 lagunek hartu zuten parte igandeko Eskolarteko Ibilaldi Neurtuan

Data: .

150 lagun inguru animatu ziren pasa den igandean Azpeitian antolatu genuen Eskolarteko Ibilaldi Neurtuan parte hartzera. Eguzkia lagun, Arauntza eta Oielantzun inguruetan aritu ziren gaztetxoak, 10 kilometroko ibilaldi luzea eta 6 kilometroko laburra zituztelarik aukeran. Besterik gabe, eskerrak eman ekimena antolatzen lagundu ziguten norbanako eta eragile guztiei eta nola ez, parte hartzera animatu ziren gaztetxo zein gurasoei. Hurrengora arte!

Argazki galeria esteka honetan duzue: labur.eus/eskolartekoa2022

202200511 Ibilaldi Neurtua